|
წმ. ეპისკოპოსი ეგნატე ბრიანჩანინოვი
წერილები
იმის შესახებ, რომ სულიერი წიგნები ჩვენი მდგომარეობის შესაბამისად უნდა შევარჩიოთ
შეეცადეთ წმინდა მამათა ის წიგნები იკითხოთ, რომლებიც უფრო მეტად შეესაბამება თქვენი ცხოვრების წესს, რათა შეგეძლოთ არა მარტო კითხვით დატკბეთ და ისიამოვნოთ, არამედ საქმითაც შეასრულოთ მათი რჩევა-დარიგებები. ერში მცხოვრები ქრისტიანი იმ დიდი მღვდელმთავრების თხზულებებს უნდა კითხულობდნენ, ხალხისთვის რომ წერდნენ და ისეთ ქრისტიანულ სათნოებებს ასწავლიდნენ, რომლებიც ყოფითი საქმეებით დაკავებულ ადამიანებს შეეფერებათ. სხვა არის მონასტრის კრებულში მცხოვრებ მონაზონთა საკითხავი: ისინი იმ წმინდა მამათა წიგნებს უნდა კითხულობდნენ, ვინც ამ სახის მოღვაწეობის შესახებ წერდა. და კიდევ სულ სხვაა დაყუდებული ბერებისათვის განკუთვნილი საკითხავი! იმ სათნოებების შესწავლა, რომლებიც კაცის ცხოვრების წესს არ შეესაბამება, სულს ოცნებასა და ყალბ მდგომარეობაში აგდებს. ცხოვრების წესისათვის შეუსაბამო სათნოებებში წვრთნა მთელ ჩვენს შრომას უნაყოფოს ხდის, ცხოვრებაც ფუჭად იხარჯება და სათნოებებიც ქარს მიაქვს: სულს არ ძალუძს მათი შენარჩუნება და იძულებული ხდება მალე აიღოს ხელი მათზე, როგორც რაღაც შეუსრულებელზე. ამგვარი, კაცის ძალებსა და შესაძლებლობებს აღმატებული წვრთნა მაღალ სათნოებებში სულს ხშირად უკურნებლად ასნეულებს და შფოთში აგდებს; ამასთან დიდი ხნით, ზოგჯერ სამუდამოდაც ართმევს ყოველგვარი ღვთისმოშიში მოღვაწეობის უნარს. უფალმა გვიბრძანა ახალი ღვინო, ანუ მაღალი სათნოებები და მოღვაწეობა, ახალ ტიკებში ჩავასხათ, ანუ იმ მოღვაწეებს მივანდოთ, ვინც უკვე წარემატა ღვთისმოშიშ მოღვაწეობაში, ვინც სული წმიდის მადლით განახლდა და განათლდა. მან აგვიკრძალა ახალი ღვინის ძველ ტიკებში ჩასხმა, ძველ სამოსელზე ახალი საკერებლის დადება. ნუ გეგონებათ, რომ მაღალი მოღვაწეობა, რომლისთვისაც თქვენი სული ჯერ არ მომწიფებულა, რამეში დაგეხმარებათ. არა! ამგვარი მოღვაწეობა შფოთს დათესს თქვენში: ბოლოს იძულებული გახდებით მიატოვოთ იგი, სულში კი მოწყინების, უიმედობის, გასასტიკების ნალექი დაგრჩებათ. ასეთ მდგომარეობაში უფრო მეტ შეცდომას, საღმრთო სჯულის მეტ დარღვევას დაუშვებთ, ვიდრე უწინ. ძველ შესამოსელს ახალ საკერებელს იმიტომ არ ადებენ, რომ ამით ნახვრეტი კიდევ უფრო გაიზრდება.
საზოგადოდ ყველა მონაზვნისა და ერში მცხოვრები ყველა ქრისტიანისთვის ყველაზე სასარგებლო საკითხავია ახალი აღთქმა და, განსაკუთრებით, სახარება. მაგრამ იგი უნდა ვიკითხოთ სიმდაბლით, არ უნდა მივცეთ თავს საკუთარი ახსნა-განმარტების უფლება, არამედ ეკლესიის განმარტებებით ვიხელმძღვანელოთ.
სარჩევი
|
