ალექსანდიაში აღმოჩენილია უძველესი ხელნაწერი, რომელიც ყოვლადწმიდა ღვთისმშობლისადმი ლოცვას შეიცავს
ეგვიპტელმა არქეოლოგებმა ალექსანდრიის მახლობლად აღმოაჩინეს დღესდღეობით უძველესი ხელნაწერი, რომელიც ყოვლადწმიდა ღვთისმშობლისადმი ცნობილ ლოცვას შეიცავს. ამის შესახებ იუწყება ანტიოქიის მართლმადიდებელი ეკლესიის პრეს-ცენტრი.
ექსპერტების შეფასებით კოპტურ ენაზე დაწერილი პაპირუსი, რომელიც მესამე საუკუნით თარიღდება, არის ყველაზე ადრეული ხელნაწერი მოწმობა პირველი საუკუნეების ქრისტიანების ლოცვისა წმინდანების მიმართ, კონკრეტულად კი ყოვლადწმიდა ღვთისმშობლისადმი.
თავად ძველი ხელნაწერის ტექსტი სრული სახით შეიცავს ცნობილ ლოცვას, რომელიც დღესაც იკითხება ეკლესიის ღვთისმსახურებისას. ანტიოქიის საპატრიარქოს პრეს-სამსახურს მოჰყავს ჩვენთვის კარგად ცნობილი ლოცვის ტექსტი არაბულ და ბერძნულ ენებზე: „მოწყალებასა შენსა მოვივლტით, წმიდაო ღმრთისმშობელო, ვედრებასა ჩუენსა ნუ უგულებელსჰყოფ, არამედ ღელვათა და ჭირთაგან მიხსნენ ჩუენ, მხოლოო კურთხეულო“ (იხ. ჟამნი, მწუხრის ბოლოს, დიდ მარხვაში საკითხავი ლოცვები).
მეცნიერები აღნიშნავენ საეკლესიო გადმოცემის დიდ სიზუსტეს, რომელმაც ძველი ლოცვები პრაქტიკულად ცვლილებების გარეშე შემოგვინახა.
არქეოლოგები ამბობენ, რომ ნაპოვნი ხელნაწერი შუქს ჰფენს ძველი ეკლესიის ლიტურგიული ცხოვრების მრავალ დეტალს; ასევე, იგი უარყოფს სკეპტიკურ შეხედულებებს, რომლებიც ქრისტიანობის პირველ საუკუნეებში წმინდანების მიმართ ლოცვას ეჭვქვეშ აყენებენ, თითქოს ეს „უფრო გვიანი ტრადიცია“ და „სიახლე“ იყოს.
ალექსანდრია, 2014 წლის 10 სექტემბერი
წყარო: http://www.pravoslavie.ru/news/73495.htm
ანტიოქიის საპატრიარქოს პრეს-ცენტრი
|