წმ. ეპისკოპოსი ეგნატე ბრიანჩანინოვი

წერილები

რჩევა-დარიგება ახალდაქორწინებულებს: მიწიერი ცხოვრება მოგზაურობაა

ჩემი განმარტოებული სამყოფელიდან, ვოლგის – დიდებული და მშვენიერი ვოლგის – ნაპირებიდან გილოცავთ თქვენს ოჯახში წამოწყებული საქმის კეთილ დასასრულს, ესოდენ სასიხარულო და თანაც საძნელო რომ არის მშობლისათვის.

ღვთის კურთხევას მოვუხმობ ახალდაქორწინებულებზე! დაე ეს კურთხევა იყოს უხვი, იმდენად უხვი, რომ თქვენ თვითონაც ცხადად დაინახოთ იგი, ნუგეშისცემა იგრძნოთ და მადლობა შესწიროთ ღმერთს მისთვის. უფალს ვინც უყვარს, იმას მწუხარებებსაც უვლენს, მაგრამ მწუხარებების კვალდაკვალ – ნუგეშისცემასაც. ის ამბავი, რომ მწუხარებას ნუგეში ცვლის, ნუგეშს კი – მწუხარება, ღმერთის რწმენას და ამა სოფლისათვის სიკვდილს შობს. სარწმუნოება ხელს ჰკიდებს კაცს და ღვთის წინაშე აყენებს. ასეთი კაცი ამა სოფელზე მაღლა დგება: მის ფეხქვეშ რჩება ეჭვების, ურწმუნოების, ცთომილებების, მაღალფარდოვანი და ამაო მსჯელობების ბნელი ქაოსი. ასე რჩება მთის მწვერვალზე მოქცეული კაცის ფეხქვეშ ღრუბლები, ქარაფები, უფსკრულები, კლდეებზე ზათქით მოხეთქილი ჩანჩქერები.

ამქვეყნიური ცხოვრება განუწყვეტელი მოგზაურობაა. ჩვენ მივდივართ და მივდივართ, უეცრად კი მარადისობის ჭიშკარი იღება და წარმოუდგენელ სივრცეში ვიკარგებით. რა მშვენივრად ამბობს წმინდა დავით მეფე: "მწირ ვარი მე ქუეყანასა ზედა, ნუ დაჰფარავ ჩემგან მცნებათა შენთა" (ფსალმ. 118. 19). მართლაც, სჯული ქრისტესი ის ძაფია, ამა სოფლის პირქუში ლაბირინთიდან ნეტარი მარადისობისკენ რომ მიგვიძღვის.

ჯანმრთელები და ბედნიერები იყავით!

1847 წლის 6 სექტემბერი.

სარჩევი